KomunaeVitise

 Një vjetori i shpalljes së Pavarësisë së Kosovës, u shënua me aktivitete të shumta në komunën e Vitisë. Fillimisht, strukturat komunale, familjarë të dëshmorëve, Përfaqësues të Organizatave dhe shoqatave të dalura nga lufta, subjekteve politike dhe qytetarë të shumtë, në orët e paradites kanë bërë homazhe tek varrezat e dëshmorëve në Viti, ku u vendosën kurora lulesh.

Këshilltarët e Kuvendit Komunal të Vitisë, kanë marrë pjesë në seancën solemne , ndërsa më pastaj është mbajtur manifestimi qendror në Shtëpinë e Kulturës “Gursel e Bajram Sylejmani”, me që rast është inauguruar edhe salla e koncerteve e cila është renovuar në tërësi. Fjalën e rastit, në Akademinë solemne e mbajti kryetari i komunës Nexhmedin Arifi, i cili pasi ka folur për rëndësinë e kësaj dite të madhe për popullin shqiptar, ka theksuar  se për në këtë ditë duhet përkujtuar vepra dhe jeta e atyre që sot vetëm fizikisht nuk gjenden në mesin tonë. Ata që dhanë më të shtrenjtën –jetën për  lirinë e Kosovës.

Kryetari Arifi ka përmendur edhe të arriturat komunale për gjatë 1 viti të pavarësisë, ndërkaq ka premtuar edhe për realizimin e projekteve të reja në përmirësimin e jetës së qytetarit vitias. Kurse Milaim Abazi, kryetar i OVL-së në Viti, është shprehur se shpallja e pavarësisë së Kosovës, është një nga elementet parësore të amanetit të dëshmorëve. “Në ditën e sotme, në zemrat tonë ndjejmë një dhembje për ata që sot nuk i kemi në mesin tonë, por një ashtu edhe për vëllezërit tanë të trojeve shqiptare të cilët kanë mbetur të ndarë. Andaj bashkimi i trojeve shqiptare, është edhe amanet i atyre që dhanë jetën për lirinë e Kosovës, është shprehur Abazi. Në këtë akademi u ndanë mirënjohje post-mortum për familjarët e luftëtarëve që kanë vdekur pas luftës.

Në orët e pasdites, është mbajtur një koncert i Ansamblit “Kemajl Azizi” dhe këngëtarëve të rinj , para platosë së Shtëpisë së Kulturës në Viti.