KomunaeVitise

Me solemnitete  rasti, sot zyrtarisht janë përuruar  objektet e reja shkollore në fshatin Radivojc dhe në Gërmovë të komunës sonë. Të pranishëm në këto solemnitete ishin edhe zv. kryemnistri i Republikës së Kosovës Hajredin Kuqi , ministri i Arsimit dhe Teknologjisë Enver Hoxhaj dhe ministri i punëve të Brendshme Zenun Pajaziti , të shoqëruar nga udhëheqja komunale e Vitisë.

Zv. Kryeministri i Kosovës Hajredin Kuqi, duke uruar nxënësit e fshatit Radivojc për objektin e ri shkollor, ka theksuar se për Qeverinë e Kosovës, çdo shkollë e re është gëzim i ri. Ai ka premtuar që edhe në të ardhmen nuk  do të mungojnë investimet për ngritjen e cilësisë së mësimit nëpër shkollat tona. Ai ka uruar gjithë nxënësit që të angazhohen për dije dhe mësim në mënyrë të dali n njerëz që krijojnë dije,që e duan vendin, që punojnë për të mirën e njerëzimit dhe njerëz të aftë që do ta fitojnë nobelin për shkencë, letërsi dhe për çështje tjera që lidhen me dijen tuaj.

Ndërsa ministri i Arsimit dhe Teknologjisë Enver Hoxhaj, është shprehur se përurimi i shkollës në Radivojc është një ditë e veçantë jo vetëm për nxënësit dhe arsimtarët e Radivojcit, mirëpo edhe për ne, pasi që këtu është mësuar në kontejner shkolla me kushte të jashtëzakonshme. Me këtë hap të ndërtimit të shkollave të reja dhe me përurimin e shkollës në këtë fshat, po i japim fund edhe mësimit që është zhvilluar në kantojner-shkolla të cilat shpesh herë i kemi parë nëpër media.

Ministri Hoxhaj njiherit ka theksuar se nga 1 shtatori i këtij viti, në të gjitha shkollat e Kosovës do të zhvillohet mësimi në dy ndërrime, që do të thotë se është një e arritur e madhe dhe rezultat i përmirësimit të infrastrukturave shkollore të vendit tonë.

Kurse kryetari i komunës së Vitisë Nexhmedin Arifi, ka shprehur kënaqësinë me pjesëmarrje në përurime të tilla dhe ka shtuar se autoritetet komunale, jën të përkushtuara për përmirësimin e kushteve nëpër shkolla, si një ndër segmentet kryesore të shoqërisë sonë. Arifi ka premtuar se edhe në të ardhmen do të jetë i përkushtuar që në të gjitha shkollat e komunës sonë të krijohen kushte edhe më të mira. Delegacioni i Qeverisë së Kosovës, më tej ka vizituar edhe Drejtorinë e arsimit si dhe Gjimnazin “Kuvendi i Lezhës” në Viti.

Projekti i shkollës fillorë në Radivojc ka kushtuar rreth 400 mijë euro dhe është donacion i Qeverisë së Kosovës, ndërsa projekti i shkollës në Gërmovë kap shumën rreth 385 mijë euro dhe është donacion i Agjencionit Evropian për Zhvillim të komunave.