KomunaeVitise

Në konferencën me gazetarë,  e fundit për këtë vit, institucionet komunale të Vitisë, vitin 2009 e cilësuan vit të suksesshëm. Nënkryetari i komunës, z. Xhevat Bislimi, pasi falënderoi mediat për një informim, siç tha ai, të balancuar, vitin 2009 e vlerësoi vit të investimeve të mëdha në të gjithë sektorët.

Duke falënderuar drejtorët e drejtorive të komunës, z. Bislimi përmendi sukseset e drejtorive veç e veç, pa harruar  të sjellë në kujtesë investimet e bëra në infrastrukturë, si: ndërtimin e shkollave të reja e meremetimin e disa të tjerave, rrugët, ujësjellës e kanalizime për shumë fshatra, investimet në shtëpinë e shëndetit në Viti etj. etj. Jo vetëm investimet ishin në fokusin e institucioneve komunale të Vitisë. Rritja e cilësisë së shërbimeve për qytetarët në të gjitha fushat, një administratë tërësisht në shërbim të qytetarëve, ngritja  e cilësisë në arsim, mbrojtja e pronës publike dhe komunale, përkujdesja për  të pastrehët, zbatimi i ligjshmërisë, donacionet dhe subvencionet në sektorin e bujqësisë  janë  disa nga të arriturat e tjera brenda vitit 2009, theksoi z. Bislimi. Falë angazhimit të institucioneve komunale, por edhe përgjegjshmërisë së qytetarëve, komuna e Vitisë këtë viti ka pasur mbi 860 000€ të hyra vetanake, që krahasuar me vitin 2008 është për rreth 112 000€ më i lartë, vlerësoi z. Bislimi, ndërkohë që bëri thirrje për gjykatat komunale që në të ardhmen të jenë partnere të  institucioneve komunale dhe  për një angazhim të shtuar të policisë. Në fund të kësaj konference, pasi vlerësoi për dinamikën e hartimit të Planit Zhvillimor e Urban të komunës, i cili pritet që diku në muajin mars t’i ofrohet për miratim Kuvendit të Komunës, z. Bislimi falënderoi shumë qytetarët e komunës së Vitisë për kulturën e treguar gjatë zgjedhjeve komunale. Ai, po ashtu, uroi të gjithë qytetarët me rastin e  Vitit të Ri 2010, me dëshirat për angazhime të mëtejme dhe për suksese të reja.